ⵜⴹⴼⵕ ⵜⵙⵇⵇⵉⵎⵜ ⵜⴰⵎⵥⵍⵉⵜ ⵏ ⵜⵙⵖⵣⵏⵜ ⵏ ⵉⵎⵏⵥⴰ ⵏ ⵡⴰⵙⵜⴰⵢⵏ ⴳ ⵓⴳⵔⴰⵡ ⵏⵏⵙ ⵡⵉⵙ ⴽⴽⵓⵥ, ⵏⵏⴰ ⵉⵜⵜⵓⵙⵏⵎⴰⵍⴰⵏ ⴰⵙⵙ ⵏ ⵓⴽⵕⴰⵙ 4 ⵖⵓⵛⵜ 2021 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ, ⵙ ⵜⵏⵙⵙⵉⵅⴼⵜ ⵏ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵎⴷⵉⵡⵍ ⴳ ⵜⵓⵜⵔⵉⵡⵉⵏ ⵏ ⵜⵙⵖⵣⵏⵜ ⵏ ⵜⵎⵙⵎⵓⵏⵉⵏ. ⵜⵖⵜⵙ ⵜⵙⵇⵇⵉⵎⵜ ⴳ ⵓⴳⵔⴰⵡ ⴰⴷ:
- ⵜⵉⴽⴽⵉ ⵏ ⵜⵙⵖⵣⵏⵜ ⵉ 15 ⵏ ⵜⵎⵙⵎⵓⵏⵜ ⴷ ⵓⵥⵟⵟⴰ ⴰⵏⴰⵎⵓⵔ ⵢⴰⴹⵏⵉⵏ, ⵜⴽⴽⴰ ⵜⵙⵇⵇⵉⵎⵜ ⵜⵙⵎⵓⵜⵜⵉ ⴳ ⵓⴳⵔⴰⵡ ⵏⵏⵙ ⴰⵎⵣⵔⴰⵢ ⴰⵙⵖⵜⵙ ⴳ ⵉⵙⴷⴰⵡⵏ ⵏⵏⵙⵏⵜ ⴰⵔ ⴷ ⵙⵎⴷⵏ ⵜⵉⴼⴰⴷⵉⵡⵉⵏ ⴷ ⵉⵙⴱⴷⴰⴷⵏ ⵓⵍⴳⵉⵏⵏ ⵏⵏⴰ ⵜⵏⵜ ⵉⵙⵎⵖⵔⴰⵜⵏ ⵙ ⵉⴳⵉ ⵏ ⵉⵏⵣⵉ ⴰⵔⴰⵡⵙⴰⵏ ⴷ ⴰⵙⵉⵎⴰⵏ ⵉ ⵜⴽⵍⴰⵍⵉⵜⵉⵏ ⵜⵉⵏⵙⵜⴰⵢⵉⵏ ⵜⵉⵏⴹⴼⴰⵕⵉⵏ;
- ⵡⴰⵔ ⴰⵙⵎⴷⵉ ⵏ ⵜⵖⵜⵙⵜ ⴳ ⵉⵙⴷⴰⵡⵏ ⵏ ⵚⴹⵉⵚⵜ ⵏ ⵜⵎⵙⵎⵓⵏⵉⵏ ⵜⵉⵏⴰⵎⵓⵔⵉⵏ ⵓⵔ ⵙⵎⵉⴷⵏⵜ ⵉⵙⴷⴰⵡⵏ ⵏⵏⵙⵏⵜ;
- ⴰⴹⴼⵕ ⵏ ⵜⵖⵔⵉ ⵏ ⵉⵙⴷⴰⵡⵏ ⵏ ⵙⵏⴰⵜ ⵜⵎⵙⵎⵓⵏⵉⵏ, ⵚⴰⴼⴹⵏⵜ ⴷ ⵜⵓⵜⵜⵔⴰ ⵏ ⵜⵙⵖⵣⵏⵜ ⴳ ⵉⵣⵎⴰⵣ ⵓⵍⴳⵉⵏⵏ;
- ⴰⵙⵎⵓⵜⵜⵉ ⵏ ⵜⵖⵜⵙⵜ ⴳ ⵉⵙⴷⴰⵡⵏ ⵏ ⵙⴰⵜ ⵏ ⵜⵎⵙⵎⵓⵏⵉⵏ ⵢⴰⴹⵏⵉⵏ ⴰⵔ ⴰⴳⵔⴰⵡ ⴰⵎⴹⴼⵕ ⵏ ⵜⵙⵇⵇⵉⵎⵜ.
ⴳ ⵎⴰⴷ ⵉⵥⵍⵉⵏ ⵙ ⵜⵎⵏⵥⴰ ⴷ ⵉⵎⵏⵥⴰ ⵏ ⵡⴰⵙⵜⴰⵢⵏ ⵏⵏⴰ ⵙⵙⵓⵎⵔⵏⵜ ⵜⵎⵙⵏⵓⵏⵉⵏ, ⵜⵙⵖⵣⵏ ⵜⵙⵇⵇⵉⵎⵜ ⵅⴼ ⵜⴱⵔⵉⴷⵜ ⵏ ⵜⵙⵖⵣⵏⵜ ⵏⵏⵙⵏ(ⵏⵜ) ⵙ ⵓⵃⵇⵇⴰ ⵏⵓⵙⵎⴰⴷ ⵏⵏⵙⵏ(ⵏⵜ) ⵉ ⵜⴼⴰⴷⵉⵡⵉⵏ ⵏ ⵓⵣⵎⵎⴻⵎ ⴳ ⵜⵍⴳⴰⵎⵉⵏ ⵜⵉⵏⵙⵜⴰⵢⵉⵏ ⴷ ⵡⴰⵔ ⴰⵏⴽⴰⴷ ⴳ ⵡⴰⵙⵜⴰⵢⵏ; ⵙ ⵜⵓⵙⵙⴷⴰ ⵏ ⵓⵡⵇⵇⵔ ⵓⵇⵊⵉⵔ ⵏ ⵜⵎⵓⵛⴰ ⵜⵉⵏⵉⵎⴰⵏⵉⵏ ⵏⵏⴰ ⵉⵜⵜⵡⴰⵎⴰⵥⵏ ⴳ ⵓⵙⴰⵜⵉ ⵏ ⵜⵏⴽⴷⴰ ⵏ ⵜⵓⵜⵜⵔⵉⵡⵉⵏ ⵏ ⵜⵙⵖⵣⵏⵜ.
ⴳ ⵓⵎⵏⵉⴷ ⴰⴷ, ⴷⴰ ⵉⵙⵎⴽⴰⵍ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⴰ ⵜⵙⵙⵉⵅⴼ ⵜⵏⵙⵙⵉⵅⴼⵜ ⵏⵏⵙ ⵜⴰⵙⵇⵇⵉⵎⵜ ⵜⴰⵎⵥⵍⵉⵜ ⵏ ⵜⵙⵖⵣⵏⵜ ⵏ ⵉⵎⵏⵥⴰ ⵏ ⵡⴰⵙⵜⴰⵢⵏ, ⵜⵉⵎⵓⵛⴰ ⵜⵉⵏⵉⵎⴰⵏⵉⵏ ⵙ ⵓⵎⵙⴰⵙⴰ ⴷ ⵓⵙⵍⴳⵏ 09.08 ⵉⵣⴷⵉⵏ ⵙ ⵓⴼⵔⴰⴳ ⵏ ⵓⴳⴳⵉⴷⵏ ⵉⵏⵉⵎⴰⵏⵏ ⵎⵏⵉⴷ ⴰⵙⵎⴽⵍ ⵏ ⵜⵎⵓⵛⴰ ⵜⵉⵏⵉⵎⴰⵏⵉⵏ.
ⵅⴼ ⵉⴳⴳⵉ ⵏ ⵎⴰⵢⴰ, ⵜⵖⵜⵙ ⵜⵙⵇⵇⵉⵎⵜ ⵜⴰⵎⵥⵍⵉⵜ ⵏ ⵜⵙⵖⵣⵏⵜ ⵏ ⵉⵎⵏⵥⴰ ⵏ ⵡⴰⵙⵜⴰⵢⵏ ⵅⴼ ⵙⵉⵏ ⵉⵙⵖⵍⴰⴼ:
- ⴰⵙⵏⴽⴷ ⴰⵎⵣⵡⴰⵔ ⵏ ⵜⵎⵙⵎⵓⵏⵉⵏ ⴷ ⵉⵏⴳⵎⴰⵎⵏ ⵉⵜⵜⵓⵙⵖⵣⵉⵏⵏ ⵏ ⵓⴱⵟⵟⵓ ⵏ ⵜⵎⵏⵥⴰ ⴷ ⵉⵎⵏⵥⴰ ⵏⵏⵙⵏⵜ ⵅⴼ ⵜⵙⵇⵇⵉⵎⵉⵏ ⵏ ⵓⵙⵉⴹⵏ ⵏⵏⴰ ⵙⵜⵉⵏⵜ, ⴰⴼⴰⴷ ⴰⴷ ⵜⴻⵜⵜⵓⵙⵡⵀⵏ ⵜⵎⵀⵍⵜ ⵏ ⵉⵏⵥⵉ ⴷ ⵓⵡⵇⵇⵔ ⵏ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢ ⵙⴳ ⵓⴱⴰⵢⵢⵓⵕ ⵏ ⴽⵓⴼⵉⴷ-19;
- ⵜⴰⵙⵖⵣⵏⵜ ⵏ ⵓⵙⵇⵇⵉⵎ ⴷ ⵓⵙⴰⵜⵉ ⵏ ⵓⴱⵟⵟⵓ ⴷ ⵜⵓⵜⵜⵔⴰ ⵏ ⵜⵎⵓⵛⴰ ⵏⵏⴰ ⵙ ⵙⵖⴰⵡⵙⴰⵏⵜ ⵜⵎⵏⵥⴰ ⴷ ⵉⵎⵏⵥⴰ ⵏ ⵡⴰⵙⵜⴰⵢⵏ, ⵙ ⵓⵣⴷⴰⵢ ⴷ ⵜⵎⵙⵎⵓⵏⵉⵏ ⴷ ⵉⵥⵟⵟⴰⵜⵏ ⵉⵜⵜⵓⵙⵖⵣⵉⵏⵏ.
ⵎⴽⵍⵍⵉ ⵜⴻⵜⵜⵓⵙⵎⵓⵜⵜⵉ ⵜⵖⵜⵙⵜ ⴳ ⵜⵙⵖⵣⵏⵜ ⵏ ⵜⵎⴰⴷⴷⴰⵙⵉⵏ ⴷ ⵉⵏⴳⵎⴰⵎⵏ ⵉⴳⵔⴰⵖⵍⴰⵏⵏ ⴰⵔ ⴰⴳⵔⴰⵡ ⴰⵎⴹⴼⵕ.
ⵜⵙⵙⴽⵜⵉⵢ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵓⴳⵔⴰⵡ ⴰⴷ, ⵙ ⵉⵡⵉⵣ ⵏ ⵓⵙⵇⵇⵉⵎ ⵅⴼ ⵓⵙⵎⴰⵢⵏⵓ ⵏ ⵓⵙⵉⵜ ⵉⵥⵍⵉⵏ ⵙ ⵉⵏⵥⵉ (https://observationelections.cndh.ma/) ⵙ ⵇⴰⵃ ⵉⴹⵕⵉⵚⵏ ⵓⵍⴳⵉⵏⵏ ⴷ ⵉⵎⴰⴷⴷⴰⵙⵏ ⵉⵣⴷⵉⵏ ⵙ ⵜⵎⵀⵍⵜ ⵜⴰⵏⵙⵜⴰⵢⵜ, ⵍⵓⵎⴰⵕ ⵙ ⵜⵓⵜⵍⴰⵢⵜ ⵜⴰⵄⵕⴰⴱⵜ ⴷ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴰⵎⴳⴳⴰⵔⵓ ⴳⵉⵙⵏ ⵉⴳⴰ ⵜ ⵜⴰⵖⵜⵙⵜ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵓⵟⵟⵓⵏ 37–21, ⴷ ⵓⵍⴰ ⵜⵉⵖⵜⴰⵙⵉⵏ ⵜⵓⵏⴱⵉⴹⵉⵏ ⵏⵏⴰ ⴷ ⵉⵍⵍⴰ ⵓⵣⴷⴰⵢ.
ⵉⵙⵓⵍ ⴰⴷ ⵏⵙⵙⴽⵜⵉ ⵎⴰⵙ ⵜⵜ ⵉⵏⵏ ⵜⴽⴽⴰ ⵜⵙⵇⵇⵉⵎⵜ ⵜⴰⵎⵥⵍⵉⵜ ⵜⵖⵜⵙ, ⴳ ⵓⴳⵔⴰⵡ ⵏⵏⵙ ⴰⵎⵣⵡⴰⵔ, ⵜⵉⴽⴽⵉ ⵏ ⵜⵙⵖⵣⵏⵜ ⵉ 23 ⵏ ⵜⵎⵙⵎⵓⵏⵜ ⴷ ⵓⵥⵟⵟⴰ, ⵅⴼ ⵉⴳⴳⵉ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵍⴽⵎ ⵓⵟⵟⵓⵏ ⵏ ⵜⵎⵙⵎⵓⵏⵉⵏ ⴷ ⵉⵥⵟⵟⴰⵜⵏ ⵉⵏⴰⵎⵓⵔⵏ ⵉⵜⵜⵓⵙⵖⵣⵏⵏ ⴰⵔ ⵖⵉⵍⴰⴷ 38 ⵏ ⵜⵎⵙⵎⵓⵏⵜ ⵜⴰⵔⵓⵏⴱⵉⴹⵜ.
