ⵙ ⵜⵓⵚⴽⴰ ⵅⴼ ⵓⴳⵔⴰⵡ ⵏⵏⴰ ⵜⵙⵏⵎⴰⵍⴰ ⴰⵙⵙ ⵏ ⵓⵙⵉⵎⵡⴰⵙ 13 ⵖⵓⵛⵜ 2021, ⵜⴻⵜⵜⵔ ⵜⵙⵇⵇⵉⵎⵜ ⵜⴰⵎⵥⵍⵉⵜ ⵏ ⵜⵙⵖⵣⵏⵜ ⵏ ⵉⵎⵏⵥⴰ ⴷ ⵜⵎⵏⵥⴰ ⵏ ⵡⴰⵙⵜⴰⵢⵏ, ⵏⵏⴰ ⵜⵙⵙⵉⵅⴼ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙⴳ ⵉⵏⴳⵎⴰⵎⵏ ⵓⵖⵣⵉⵏⵏ ⵉ ⵉⵏⵥⵉ ⵏ ⵡⴰⵙⵜⴰⵢⵏ ⴰⴷ ⵡⵇⵇⵔⵏ ⵉⵙⵡⵓⴷⴷⵓⵜⵏ ⵉⵣⵉⴽⵉⵢⵏ ⵉ ⵡⴰⵔⴰⵢ ⵙⴳ (ⴽⵓⴼⵉⴷ-19) ⵙ ⵓⵙⵡⴰⵍⴰ ⵏ ⵜⵙⵇⵇⵉⵎⵜ ⵢⴰⵜ ⵜⵎⵙⵙⴽⵜⵉⵢⵜ ⵉ ⵉⴳⵏⵙⴰⵙ ⵓⵍⴳⵉⵏⵏ ⵏ ⵉⵏⴳⵎⴰⵎⵏ ⴰⴷ.
ⴳ ⵓⵎⵏⵉⴷ ⴰⴷ, ⴷ ⵙ ⵓⵙⵔⵙ ⵏ ⵉⵥⵕⵉ ⵅⴼ ⵜⵎⵙⵓⵜⴰⵍ ⵉⵣⴷⵉⵏ ⵙ ⵓⴱⴰⵢⵢⵓⵕ ⵏⵏⴰ ⴱⴰⵀⵔⴰ ⵉⵣⵣⵉⴳⵉⵣⵏ, ⵜⴻⵜⵜⵔ ⵜⵙⵇⵇⵉⵎⵜ ⵙⴳ ⵜⵎⵏⵥⴰ ⴷ ⵉⵎⵏⵥⴰ ⵏ ⵉⵏⴳⵎⴰⵎⵏ ⵓⵖⵣⵉⵏⵏ ⴰⵡⵇⵇⵔ ⵓⵇⵊⵉⵔ ⵏ ⵉⵙⵡⵓⴷⴷⵓⵜⵏ ⵉⵣⵉⴽⵉⵢⵏⵉ ⵡⴰⵔⴰⵢ ⵙⴳ (ⴽⵓⴼⵉⴷ-19), ⴷ ⵓⵍⴰ ⵉⵙⵡⵓⴷⴷⵓⵜⵏ ⵉⵎⵢⵓⵔⴰⵏⵏ ⵏ ⵉⵏⵥⵉ, ⵍⵓⵎⴰⵕ ⵙⴳⵉⵙⵏ ⵜⵉⵎⴳⴳⵉⵜⵉⵏ ⵜⵉⵏⴹⴼⴰⵕⵉⵏ:
- ⴰⵃⵇⵇⴰ ⵏ ⵡⴰⵔ ⵜⵎⴰⴹⵓⵏⵜ ⵙ ⵓⴱⴰⵢⵢⵓⵕ ⵏ (ⴽⵓⴼⵉⴷ-19)
- ⵜⵉⵎⵍⵙⵉⵜ ⵏ ⵜⴽⵓⵎⴰⵎ ⵙ ⵜⵡⵉⵍⴰ ⵜⴰⵎⴰⴷⵓⵙⵜ, ⵜⵓⴳⴳⵓⴳⵜ ⵏ ⵜⴼⴳⴳⴰ, ⴰⵙⵉⵣⴷⴳ…;
- ⴰⴳⵯⵉ ⵏ ⵉⴳⵉ ⵏ ⵜⵙⵎⵉⴳⴰⵍ ⵏ ⵉⵏⵥⵉ ⴳ ⵡⴰⴷⴷⴰⴷ ⵏⵏⵉ ⴳ ⴷ ⵜⵓⴳⴳⴰ ⴽⵔⴰ ⵏ ⵜⵎⴰⵜⴰⵔⵜ ⵙⴳ ⵜⵎⵉⵜⴰⵔ ⵏ ⵓⴱⴰⵢⵢⵓⵕ ⵏⵉⵖ ⴳ ⵡⴰⴷⴷⴰⴷ ⵏ ⵜⴷⵔⴰⵡⵜ ⴰⴽⴷ ⴽⵔⴰ ⵏ ⵓⴳⴳⵉⴷⵏ ⵏⵏⴰ ⵙ ⵜⵃⵇⵇⴰ ⵜⵎⴰⴹⵓⵏⵜ ⵏⵏⵙ ⵏⵉⵖ ⴷ ⴼⵍⵍⴰⵙⵏ ⵓⴳⴳⴰⵏⵜ ⵜⵎⵉⵜⴰⵔ;
- ⵉⵡⵉⵣ ⵅⴼ ⵜⵎⴳⴳⵉⵜ ⵏ ⵓⴳⵣⵣⴰⵢ ⵎⴳⴰⵍ ⴰⴱⴰⵢⵢⵓⵕ (ⵉⴽⵙⴰⵢⵏ ⵏⵏⴰ ⵙⵡⵓⵜⵜⴰⵏⵜ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵜⵉⵎⵥⵍⴰⵢⵉⵏ);
- ⴰⵙⵓⵖⵏ ⵙ ⵜⵎⴳⴳⵉⵜⵉⵏ ⵜⵉⵣⵉⴽⵉⵢⵉⵏ ⵏⵏⵉ ⵙⵔⵙⵏⵜ ⵜⵏⴱⴰⴹⵉⵏ ⵜⵉⵎⵏⵜⴰⵢⵉⵏ ⵖ ⵓⵙⴰⴷⴰⴼ ⵏ ⵉⵙⵉⵔⴰⵜⵏ ⵏ ⵓⵙⵜⴰⵢ ⴷ ⵉⵙⵉⵔⴰⵜⵏ ⵏ ⵜⵙⵎⵓⵏⵉ ⵏ ⵜⵙⵇⵇⵉⵎⵉⵏ ⵏ ⵓⵙⵉⴹⵏ, ⵙⴳⵉⵙⵏⵜ ⵙ ⵓⵥⵍⴰⵢ : ⴰⵙⵇⵇⵓⵍ ⵏ ⵜⵙⴽⵯⴼⵍⵜ ⵏ ⵜⵔⵖⵉ ⵏⵏⵙⵏ ⴷⴰⵜ ⴰⵙⴰⴷⴼ ⵖⵔ ⵉⴷⵖⴰⵔⵏ ⴰⴷ, ⴷ ⵓⵙⵎⵏⵉⴷ ⵏ ⵓⵙⵍⴽⵉⵏ ⵏ ⵓⴳⵣⵣⴰⵢ;
- ⴰⵡⵇⵇⵔ ⵏ ⵓⵣⴰⵔⵓ ⵏ ⵜⵓⴳⴳⵓⴳⵜ ⵉⵜⵜⵡⴰⵜⵜⵔⵏ ⴳ ⵓⴳⵏⵙ ⵏ ⵉⵙⵉⵔⴰⵜⵏ ⵏ ⵓⵙⵜⴰⵢ ⴷ ⴳ ⵓⵣⵎⵣ ⵏ ⵓⵏⵎⴰⵍⴰ ⵏ ⵜⵙⵇⵇⵉⵎⵉⵏ ⵏ ⵓⵙⵉⴹⵏ;
- ⴰⵡⵇⵇⵔ ⵏ ⵉⵣⵔⴼⴰⵏ ⴷ ⵜⵎⵔⵉⵙⵉⵏ ⵏ ⵉⵎⵏⵥⴰ ⵏ ⵡⴰⵙⵜⴰⵢⵏ ⵙ ⵓⵎⵙⴰⵙⴰ ⴷ ⵉⵎⵏⵏⵉⵜⵏ 16 ⴷ 17 ⵙⴳ ⵓⵙⵍⴳⵏ ⵓⵟⵟⵓⵏ 30.11, ⴷ ⵉⴹⵕⵉⵚⵏ ⵓⵍⴳⵉⵏⵏ ⴷ ⵉⵙⵏⵎⴰⵍⴰⵜⵏ ⵏⵏⵉ ⵙ ⵜⵍⵍⴰ ⵜⵡⵓⵔⵉ ⵣⵖ ⵓⵍⴰⵖⵉ ⵏ ⵡⴰⴷⴷⴰⴷ ⵏ ⵓⵖⴰⵡⵍ ⴰⴷⵓⵙⴰⵏ ⴳ ⵍⵎⵖⵔⵉⴱ;
- ⴰⵙⵙⵉⵡⴹ ⴰⴷⵖⵢⴰⵏ ⴷ ⵓⵏⵣⵉⵍ ⵅⴼ ⵡⴰⴷⴷⴰⴷⵏ ⵏ ⵓⵏⵓⴼⵏ ⵏ ⵜⵎⵔⵉⵙⵉⵏ ⵜⵉⵣⵓⵛⵛⵉⵍⵉⵏ ⵏ ⵜⵎⵏⵥⴰ ⴷ ⵉⵎⵏⵥⴰ, ⵙ ⵓⵎⵙⴰⵙⴰ ⴷ ⵉⵙⴱⴷⴰⴷⵏ ⵏ ⵓⵎⵏⵏⵉ 18 ⵙⴳ ⵓⵙⵍⴳⵏ ⵓⵟⵟⵓⵏ 30.11;
- ⴰⵙⵏⵖⵎⵙ ⵏ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵜⴰⵎⵥⵍⵉⵜ ⵏ ⵉⵎⵏⵥⴰ ⵙ ⵉⵙⴼⴽⴰ ⵉⵏⴱⵣⴰⵣⵏ ⵅⴼ ⴽⵔⴰⵢⴳⴰⵜ ⴰⴷⴷⴰⴷ ⵉⵣⵎⵔⵏ ⴰⴷ ⵢⴰⵙⵉ (ⴽⵓⴼⵉⴷ-19).
ⵙ ⵓⵙⵎⵀⵍ ⵏ ⵜⵖⵜⴰⵙⵉⵏ ⵏ ⵜⵙⵇⵇⵉⵎⵜ ⵜⴰⵎⵥⵍⵉⵜ ⵏ ⵜⵙⵖⵣⵏⵜ ⵏ ⵜⵎⵏⵥⴰ ⴷ ⵉⵎⵏⵥⴰ ⵏ ⵡⴰⵙⵜⴰⵢⵏ, ⵜⴻⵜⵜⵔ ⵜⵙⵇⵇⵉⵎⵜ ⵙⴳ ⵉⵏⴳⵎⴰⵎⵏ ⵓⵖⵣⵉⵏⵏ ⴰⵙⵎⵏⵉⴷ ⴰⵎⵣⵡⴰⵔ ⵏ ⵓⴱⵟⵟⵓ ⵏ ⵜⵎⵏⵥⴰ ⴷ ⵉⵎⵏⵥⴰ ⵏⵏⵙⵏ ⵅⴼ ⵜⵙⵇⵇⵉⵎⵉⵏ ⵏ ⵓⵙⵉⴹⵏ ⵏⵏⴰ ⵙⵜⵉⵏ, ⴰⴼⴰⴷ ⴰⴷ ⵜⵡⵀⵏ ⵜⵎⵀⵍⵜ ⵏ ⵉⵏⵥⵉ ⴷ ⵓⵡⵇⵇⵔ ⵏ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢ ⵣⵖ ⵓⴱⴰⵢⵢⵓⵕ ⵏ (ⴽⵓⴼⵉⴷ-19). ⵎⴽⴷⴰ ⵜⴻⵜⵜⵔ ⵜⵙⵇⵇⵉⵎⵜ ⵣⵖ ⵉⴳⵎⴰⵎⵏ ⴰⵙⵖⵣⵏ ⵏ ⵓⵙⵇⵇⵉⵎ ⴷ ⵓⵙⴰⵜⵉ ⵏ ⵓⴱⵟⵟⵓ ⵏⵉⵖ ⵜⵓⵜⵜⵔⴰ ⵏ ⵓⵎⵍⴰⵏ ⵏⵏⴰ ⵙ ⵙⵖⴰⵡⵙⴰⵏⵜ ⵜⵎⵏⵥⴰ ⴷ ⵉⵎⵏⵥⴰ ⵏ ⵡⴰⵙⵜⴰⵢⵏ, ⵙ ⵓⵣⴷⴰⵢ ⴷ ⵜⵎⵙⵎⵓⵏⵉⵏ ⴷ ⵉⵥⵟⵟⴰⵜⵏ ⵓⵖⵣⵉⵏⵏ.
ⵉ ⵓⵙⴽⵜⵉⵢ, ⵜⴽⴽⴰ ⵜⵙⵇⵇⵉⵎⵜ ⵜⴰⵎⵥⵍⵉⵜ ⵏ ⵜⵙⵖⵣⵏⵜ ⵏ ⵉⵎⵏⵥⴰ ⵏ ⵡⴰⵙⵜⴰⵢⵏ ⵜⵖⵜⵙ ⵜⵉⴽⴽⵉ ⵏ ⵜⵙⵖⵣⵏⵜ ⵉ 44 ⵏ ⵜⵎⵙⵎⵓⵏⵜ ⴷ ⵓⵥⵟⵟⴰ ⴰⵏⴰⵎⵓⵔ, ⵅⴼ ⵉⴳⴳⵉ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵜⴼⵔⵉⵙⵜ ⵏ ⵓⵏⴳⵎⴰⵎ ⴰⵏⴰⵎⵓⵔ, ⴹⴰⵕⴰⵜ ⴰⵙⵎⴰⴷ ⵏ ⵇⴰⵃ ⵜⴼⴰⴷⵉⵡⵉⵏ ⵏⵏⵉ ⵜⵏ ⵉⵙⵖⵔⵜⵏ ⵉ ⵉⵏⵥⵉ ⴰⵔⴰⵡⵙⴰⵏ ⴷ ⴰⵙⵉⵎⴰⵏ ⵉ ⵜⴽⵍⴰⵍⵉⵜⵉⵏ ⵜⵉⵏⵙⴰⵜⴰⵢⵉⵏ ⵜⵓⴹⴼⵉⵕⵉⵏ.
